|
05/03/2010 17:00 АҦСНЫ, АҞӘА
Москва наунагӡа абзиараз ҳәа иарҳәеит Аҧсны аҳәынҭқарра раҧхьатәи Ахада Владислав Григории-иҧа Арӡынба.
Ауаа ааира иалагеит шьыжьнаҵы – наунагза абзиараз ҳәа иарҳәон Урыстәыла инхо аҧсуаа, хатәгәаҧхарала Аҧсны ахақәиҭраз еибашьуаз, аҵарауаа аполитикцәа.
Адышшыларазы арахь имҩахыҵит Владимир Жириновскии, Владимир Колесников, Алексеи Чандаров, Сергеи Бабурин, Урыстәыла иҟоу Аахыҵ Уаҧстәыла ацҳаражәҳәаҩ Дмитрии Медоев уҳәа убас ирацәаҩны.
12.30 рзы алахьеиқәратә митинг ааиртит Урыстәыла иҟоу Аҧсны ацҳаражәҳәаҩ Игор Ахба. Амитинг аҟны иқәгылаз Аҧсны Апыза-министр С.Шамба иҳәеит: “Владислав Григори-иҧа Арӡынба иҧсҭазаареи игәабзиареи ақәиҵеит ижәлар рымаҵ аура”. Дызнысыз аҧсҭазааратә мҩба игәаларшәо, Шамба иазгәеиҭеит, Владислав Арӡынба “наунагӡа ажәлар ргәалашәараҿы даанхоит ихьыҧшым аҳәынҭқарра ашьаҭаркҩы иакәны”.
“Идунеи иҧсахит апатриот, аҳәынҭқаррауаҩ, аҵарауаҩ, - иҳәеит Урыстәыла Афедерациа аҳәынҭдума адепутат Владимир Колесников. – Уи зегьы ҳзын дцәыӡ дууп, зегь раҧхьаӡа иргыланы Сергеи Уасил-иҧа Багаҧшь изы.
Аахыҵ Уаҧстәыла ажәлари анапхгареи рыхьӡала агәакьацәа дрыдышшылеит Урыстәыла Афедерациаҿ иҟоу Аахыҵ Уаҧстәыла ацҳаражәҳәаҩ Дмитрии Медоев:- “Аҧсны жәлар ргәрҩа рыцеиҩыршоит Кавказ зегьы”.
Алахьеиқәҵаратә митинг аҟны иықәгылеит Аҧсны аҳәынҭқарра раҧхьатәи Ахада Мрагылараҭҵаара Аинститут аҟны аус ицзухьаз, изааигәаз Саламбек Хаджиев, Ахәҳахәҭра-економикатә Академиа аректор Сергеи Бабурин. “Ҳара иахьа аҵыхәтәантәи имҩахь днаскьаагоит Афырхаҵа”,- инаҵшьны иазгәеиҭеит иқәгылараҟны.
Адыҕажәлар рыхьӡала дықәгылеит Абыргцәа Рхеилак ахантәаҩы Иурии Агирбов, аҧсуа диаспора рыхьӡала – Тарас Шамба. Уи иҳәеит ҭелла адышшыларақәа шыҟарҵо Ҭырқәтәылантә, Сириантә, Германиантә, ҧасатәи асовет еидгыла ареспубликақәа.
Алахьеиқәратә митинг хырқәшо И.Ахба иҳәеит, адышшыларақәа шыҟарҵаз иара убас Урыстәыла Афедерациа Ацентртә алхратә комиссиа ахантәаҩы Владимир Чуров, Аҳәынҭдума ахада Борис Грызлов, Москва ақалақь ахада Иурии Иужков, Ахәҳахәҭра-ааглыхратә палата ахантәаҩы Евгении Примаков.
16.00 сааҭ рзы иҷыдоу реисла аҧсы дызҭоу аҭоубыҭ аагахоит Аҟәаҟа.
|
